A verdade é que foi unha festaza, non se trabucaba Enrique no vídeo da promo. Abonda con ler algúns dos comentarios que nos deixastes no facebook e no twitter, ou ver algunhas das fotos que compartistes!
O pasado 29 de marzo celebramos a X edición da Festa da Merenda. Ás 12 do mediodía comezaba a degustación gratuita das merendas e a xornada festiva alongaríase ata a 1:30 da madrugada. Por suposto, todo ese tempo amenizado con música e, como non, con merendas!
Ás 19:30 tocáballe o turno a dúas gandes orquestras: Cinema e París de Noia que farían vibrar a todo mundo.
O bochinche e a pulpería completaron a xornada. Tivemos cheo absoluto dos aparcadoiros e das mesas da área. E ata se esgotaron os panos! Siguen en aumento os fans da Merenda!!!
Calculamos que preparariamos arredor dunhas 1.500 merendas. Para iso, empregáronse uns 250kg de fariña, unhas 80 ducias de ovos da casa e uns 70kg de touciño de porco da casa. E todo iso gracias ás nosas magníficas cociñeiras. Sen elas nada disto sería posible. Sodes as mellores! Tamén queremos agradecer a todos os veciños/as que colaborastes cociñando, servindo, aparcando, etc. Sen a vosa axuda, non sería unha festaza!
Agradecer tamén ao concello de Frades o seu interese na festa e a tódolos patrocinadores polo seu gran de area. Por último, moitas gracias aos que viñestes a pasar o día con nós e colaborastes coa festa pagando o aparcadoiro, mercando un pano, unha rifa ou unha merenda para levar. Moitas gracias tamén, aos que estivestes comendo na área e recollestes todo ao marchar.
E agora, acabouse a romería...
Vémonos o ano que vén festeiros!
*Máis fotos na sección "Aiazo en imaxes", en facebook e twitter.
Ningún comentario:
Publicar un comentario